發酒癲鬧衰人？何雁詩否認甩拖
歌手何雁詩上星期單拖出席好友陳嘉寶（Anjaylia）的婚宴，事後有傳她在席上發酒癲，不但大吵大鬧，又鬧某人是「衰人」，更指有司儀問到邊個是單身，她即衝出來認單身，惹來她與男友鄭俊弘（Fred）感情生變的揣測。何雁詩昨否認醉酒發癲：「唔知點解作篇咁嘅嘢出嚟，完全冇咁嘅事，我同阿Fred OK冇問題。」
何雁詩承認當晚有飲酒，但感觸和開心是因眼見好姊妹結婚，賴慰玲又有BB，完全與感情事無關：「唔知點解會扭曲關我事，完全冇人問過係咪單身，我都冇鬧人係衰人。（你哋感情點？）唔需要擔心，我哋好穩定，依家好開心。」
此外，有傳她醉酒後由賓客甄澤權在旁安慰，甄澤權說：「嗰晚何雁詩同大家都好開心，佢見姊妹個個都搵到幸福，就特別感觸同高興，飲兩杯一定有，但因為好多人，真係冇留意到佢講衰人同單身。」