張偉文感激粉絲出錢助醫病
早前受傷患影響的「靚聲王」張偉文，將於9月20至22日假伊利沙伯體育館舉行「張偉文離別的叮嚀40周年演唱會」。日前他受訪時毋須坐輪椅，全程靠拐杖支撐。他坦言左腳經常麻痹，不能企太耐︰「今日冇坐輪椅，其實係要坐，行得耐隻腳會冇力。開騷時架輪椅可能上台，到時會做一個斜路上落舞台，走近觀眾握手Say Hi。（依家覆診次數密？）唔密，一個月一次，但要日日食藥。」
坐輪椅開騷
縱使不能雙腳站台獻唱，但他不感氣餒︰「有觀眾睇我就繼續唱，會唔捨得佢哋，歡呼聲就係最好嘅支持。如果唔唱歌，我都唔知做咩好，除咗唱歌冇做過第二樣嘢。依家市道唔好，做監製又唔啱，惟有出動自己，想辦法唱到咪盡量唱。（做運動訓練雙腳？）情況都幾嚴重，唔係做運動就得。一個演唱會要3個鐘，唔會有奇迹出現，都係坐住輪椅遊嚟遊去，坐喺度唔影響我唱歌。」
出道40年，張偉文自認比其他歌手好命︰「唱片有80%都好賣，呢個係好難！你見有啲歌手出一、兩隻碟就冇影，所以覺得自己好幸運，鍾意唱歌又可以表演，仲唔止一次，真係非常滿足。至於腰患、腳患呢啲，我覺得應該忍住。」他大爆有粉絲出錢相助醫病︰「佢哋有啲會畀大利是我，非親非故都對我好，係一種鼓舞。唔好話攞人呢啲恩惠好貪錢，人哋千方百計咁寄畀我，有好多歌迷都係朋友，整親都仲有人聽我唱歌，仲怨咩？」
有意學泰文
提到去年完成巡演後，他曾表示想移居泰國芭堤雅，他笑言已實現願望，曾於當地居住近8個月，不過語言不通︰「好難同當地人打成一片，如果畀多啲時間我學泰文，或者會學識。（之後再住？）會，因為唔使用好多錢，醫院設備又完善。」