夏韶聲恨同囡囡傾心事 Regen黐阿媽沖涼密斟
夏韶聲（Danny Summer）是香港搖滾之父，張惠雅（Regen）則是前跳舞組合HotCha成員之一，兩人似乎大纜都扯唔埋，不過幾年前一套劇集令他們成為「父女」。Danny想女兒有事就同老竇講，而Regen黐媽咪，鍾意一齊沖涼傾密偈。講到旅行，Regen即興買機票就飛，Danny卻怕搭長途機，寧願行路！
夏：夏韶聲
張：張惠雅
揀男友要似老竇咁老實
夏：我哋12月9同10號去元朗厦村音樂節演出，呢個嘉年華可以帶成家人去當旅行，Regen你帶邊個？
張：我帶男朋友！講笑啫，我未有男朋友。
夏：我係你老竇，你要清楚講畀我聽，我批准先得，畀我鑑證一吓。不過呢個係你嘅自由，呢個我經歷過。就算我睇到個女嘅男朋友唔好都唔會講，係佢鍾意、佢揀，只可以叫佢小心。但當佢唔小心應該講畀邊個聽？男朋友定我？我同阿女講：「有咩事唔係同佢講，係同我講，我同你揸主意。」大家應該明白，好多時，尤其做女仔嘅家長真係幾難嘅事。如果幫Regen揀男友最緊要似我，事業少少有成同老實，聽個男仔講嘢就知。依家年代加多樣嘢，就係唔好成日撳電話。
張：我拍拖一定同屋企人講，同屋企人冇嘢唔講得。但對男仔有好感或者曖昧，就冇吓吓同屋企人講，費事吓吓都驚動屋企人。同個男仔開始咗就會同屋企人講聲，最好穩定少少先，知道對方唔係玩玩吓就可以講。我拍拖遇到困難或者唔知點做，主要搵家姐傾，佢好似我Best Friend，又可以畀意見自己。同埋我好鍾意沖涼嘅時候叫媽咪入嚟一齊沖涼傾偈，我哋好Close，呢個時候乜都講，拍拖開心、唔開心佢都會知。
唔搭飛機寧願行路
夏：我估我個女遲早嫁咗去第二度！個世界真係好大，我唔敢講港男唔好，但有得選擇咪睇多啲。我好少去旅行，做嘢先坐飛機。當然我有去過旅行，但唔係好記得。最深刻印象就係3年前去布吉，曬到人字拖個印到依家都未退！以前我走嚟走去太多，依家我都想去嘅，但真係太多嘢做，有啲麻木。如果可以行路返美國搵屋企人，我寧願行。搭飛機真係好辛苦，十幾個鐘頭。我又畀人縱慣咗，身邊有經理人、公司啲人，我坐低佢哋已經買咗嘢畀我食，機票又買埋，如果得我自己，都唔知去邊度好，所以依家好少去旅行。
張：我啱啱喺日本返嚟，係買完機票第二日就飛。突然有幾日假就自己去大阪一間跳舞學校上堂，去玩同食嘢增肥。5年前我喺大阪住過半年，日日不停上堂，對呢個地方好多留戀，成日都想返去。我都想搵個人，但我咁即興，好難有朋友陪到我。依家最期待去一個冇終點嘅旅行，買一張去程機票，然後識到新朋友話邊個地方好正就去嗰度，去到覺得係時候返嚟先返。暫時我去啲地方都好安全，好少罪案喺旅客身上發生。我細細粒，啲人對我好好，喺餐廳見到我一個人就會主動請我食飯。我冇帶防狼器，但盡量唔會好夜出街。
住美國被迫買槍
夏：我次次返美國都話幫阿女買槍，嗰邊買槍好易之嘛，但要有時間練到肯定操作到，同埋唔畀細路掂到。我個大孫仔成日都「超超超」，如果畀真嘢佢「超超超」就死。槍係危險，但美國呢個環境，佢哋有句說話係「唔打911，寧願有支槍」，因為警察嚟到你都可能死咗，有支槍傍身先保護到屋企。我唔係鼓吹呢樣嘢，但自己住喺嗰度知道發生咩事。呢次返去係咪又買呢？呢個講住先，不過槍舖喺我屋企隔籬之嘛，隨時可以買。美國咁大地方係禁唔到槍，人有槍但你冇，就代表你死梗，但你有槍就可以自衞。我喺三藩市見過好多，劇集都係咁，報警要提早20分鐘，所以一定要自己保護自己。
文：音樂組
攝：劉斌
場地：大浪音樂
樂器：通利琴行