郭富城捱到躁底靠囡囡融化
近日在內地工作的天王郭富城昨晚返港出席活動，他直認對兩個多月大的女兒非常掛念，又指因投入新戲角色而變得躁底，但望見女兒即融化，乜火都冇晒！
郭富城、陳嘉寶（Anjaylia）、森美、袁偉豪、胡子彤、連詩雅及鄭融等昨晚到中環出席品牌活動，早前榮升父親的城城近期留在內地工作，昨晨返港即趕返家看看女兒，直認對女兒非常掛念，他又指新戲角色性格暴躁，令平日都變得躁底：「有時抽離唔到，平時都躁咗。（對屋企人呢？）咁就梗係唔會，見到個女咩都融化晒！（呢兩個月咪好少見個女？）科技發達，點都可以見到，家人都好體諒！」
賽車安全過揸車
城城又指在內地組了一隊車隊名為「富盛車隊」，去年有參加賽車，但今年則沒有，希望之後可繼續組隊參賽，問到榮升爸爸後，對賽車會否多了顧慮？城城說：「賽車係有一定危險性，無論有冇家室都要注意安全，但其實做好措施嘅話比街道上揸車仲安全。」
陳嘉寶新婚呻攰
至於新婚不久的Anjaylia笑言近日夜夜笙歌，要招呼大批由海外來港的朋友：「遊船河、打邊爐、唱K，搞到依家仲係好攰，都冇乜時間過二人世界，只係喺屋企執屋。（幾時度蜜月？）唔去喇！因為要工作，係我冇情趣，拍拖時已經去過好多地方。」
講到有指好友何雁詩在其婚禮上發酒癲，衝上台自認單身又鬧人衰人，Anjaylia說：「我見唔到，司儀都話冇問過人係咪單身，應該係冇咁嘅事。（佢爆喊？）都正常，個個姊妹都喊，我最後見到周慧敏祝賀我，就到我忍唔住。（何雁詩依家感情生活點？）以我所知唔係單身，佢感情生活穩定。」
文：影視組