想阿嬌開心拍拖 蔡卓妍：畀條路行吓！
藝人蔡卓妍（阿Sa）、龔慈恩女兒林愷鈴、姜麗文等昨日出席時裝店重新開幕活動，對於拍檔鍾欣潼（阿嬌）的男友「醫界王陽明」賴弘國不停被起底，阿Sa說：「唔好寫咪冇，畀啲空間佢哋，唔好成日抽住唔放，畀人哋開開心心拍拖。（慶幸自己拍拖好安穩？）唔可以咁講，除咗工作有番啲私人生活，唔好咁多茶餘飯後話題，畀條生路行吓。（阿嬌話怕戀情見光就死？）呢行冇法，心態要調節，我教阿嬌唔好理，自己知咩事同開心就得，唔使公開交代！」
至於姜麗文被指新歌投入與舊愛鄭俊弘的情史，她說：「我十年冇出新歌。」指歌曲是描述之前的情史，又說患上抑鬱症4年，是寫她個人的故事：「想畀大家知依家我冇唔開心，放低咗同錫自己。」至於藝人龔慈恩的17歲女兒林愷鈴有傳簽杜琪峯進軍娛樂圈，她表示仍是學生，交由公司公布。
