提郭采潔即硬軚 古天樂變人肉錄音機 三不回應

影星古天樂（古仔）、張智霖（Chilam）、羅蘭、雨僑和關寶慧等前晚出席驚慄電影《常在你左右》首映禮，吸引大量粉絲圍觀，場面墟冚。兩大型男在訪問時互笠高帽、互讚靚仔。《常》片為《陰陽路》系列20周年紀念作，參演過七集的古仔十足開籠雀般滔滔不絕，指今次開拍是監製南燕的心願，電影令觀眾又驚又喜，適合拍拖帶女仔睇。

張智霖有樣學樣

問到是否與緋聞女友郭采潔睇？古仔即硬晒軚變機械人狂「播帶」說：「唔係事實嘅嘢唔回應。（你哋拍拖？）唔係事實嘅嘢唔回應。（有聯絡？）唔係事實嘅嘢唔回應。」轉問Chilam知否古仔感情狀況時，他即有樣學樣扮古仔做「錄音機」：「唔係事實嘅嘢唔回應！」

Chilam為電影化身變態「的哥」，既要分屍又要自殺，他更為角色增肥十幾廿磅，至今仍未成功減磅！至於拍了多次《陰》片系列電影的關寶慧，今次客串反派整容醫生，她承認該系列是其演藝生涯中重要一環，不過她有意拍女人喊戲，笑言不會找小鮮肉拍檔：「我鍾意老肉！都鍾意古天樂同張智霖，不過佢哋都唔係老肉！」

古天樂、郭采潔拍戲傳出緋聞。	雨僑拍邪門戲，直認驚到震。	關寶慧前晚行型格Look。

雨僑瞓棺材眼皮跳

而雨僑則表示下周三（25日）會為宣傳而闖入盛傳有結界的西貢郊區做直播，不相信有結界的她說會先行祈禱：「男朋友（羅力威）仲話一齊去，想睇吓。（帶佢去？）做嘢呀！冇理由帶晒一家大細去，咁唔專業。」飾演女鬼的她指挑戰了瞓棺材、跳樓等邪門戲：「瞓棺材時個心係咁跳，跳到眼皮都跳埋，好驚林家棟打開棺材，我對眼仲眨緊！（眨住入鏡？）閉氣好啲，成身會硬晒！」

文：影視組