大頭蝦都有遺傳？ 謝婷婷爛瞓冇熄火
藝人謝婷婷與女子組合Super Girls成員陳穎欣（Yanny）昨日現身鞋履品牌活動，婷婷自爆有荷里活監製邀請她成為電影監製，她說：「佢覺得我嘅Idea幾好，係一套動作喜劇，但十劃都未有一撇。做監製責任好大，我都唔係咁清楚，只係想畀Idea。」
對於前男友安志杰結婚，她坦言不知情，但會祝福對方：「好戥佢開心，佢係個好男仔，佢哋好襯。（走寶？）我都係個好女仔，我會付出時間一齊嘅都係好男仔，只係大家唔夾。（心急結婚？）每個人對幸福嘅定義都唔同，我都好幸福，唔一定要結婚生仔。」
此外，談到其父謝賢早前自爆曾三度忘記熄火而險釀火災，婷婷笑言可能遺傳自父親，亦試過發生兩次類似事件：「有次瞓着咗七個鐘都冇熄火，第二日入廚房發覺好熱，好彩冇發生意外。（會否擔心爸爸？）都擔心，所以游說咗佢裝平安鐘。（佢好抗拒？）因為佢好獨立，又或者佢想人哦佢，我都想要個平安鐘。（陪爸爸一齊住？）我有問過佢，但佢唔肯。」
而Yanny則表示暫未有計劃與音樂監製男友陳考威結婚，笑言想事業有更多發展：「如果佢咁快同我求婚即係阻我發達。」
