拍拖近3年 傅穎隱形男友結婚至公開
近年專注在內地發展的藝人傅穎，日前返港為藝人海俊傑與化妝師太太的婚禮擔任伴娘，問到可有衝動結婚？她說：「暫時未係時候。」跟蒙古男友拍拖差不多三年，惟二人聚少離多，她說：「同之前一樣見面唔多，但都OK。」由於男友從未曝光，有人懷疑其男友是否真的存在，她笑說：「唔通係空氣人？我完全唔介意大家點估，唔想過度消費一段感情，亦唔想巨細無遺咁去講，講太多係無謂。」她又指今日唔知聽日事，直言若結婚會公開：「因為冇得瞞。（生BB？）結咗婚先生，我會好好保養自己。」
本月22日是傅穎的生日，她表示屆時將在上海或北京，問男友可會給她驚喜？她說：「我冇期望要啲乜，今年未知會唔會一齊慶祝，舊年有一齊。」她解釋與男友同樣在內地不同地方工作，每年僅得幾個月見面：「工作有時唔到自己話事，見唔到就專心工作。」
反串同鹿晗撞樣
傅穎最近拍攝兩輯宣傳照，一輯扮男裝，另一輯則露背晒性感。她將反串照放上微博，有粉絲指其造型貌似人氣男神鹿晗，她笑說：「佢靚仔好多，我睇過佢套劇，真係好靚仔。」她曾在古裝劇反串，不少劇組人員指她扮男裝比女裝好看，她笑說：「唔知開心定唔開心，但都好，多一條戲路。（男友喜歡你扮男裝？）佢一定話點都好睇，唔會有第二個答案。」談及裸背照，她笑言並非真空上陣：「我有戴Nude Bra。（有信心露背多過露前面？）最好唔露，密實啲會有信心啲，我一向畀人感覺唔係性感。」
文：音樂組