虎豹二人組最緊要好玩！ 阿倫乘機向許冠傑「追債」

「歌神」許冠傑（Sam）及樂壇校長譚詠麟（阿倫）將於8月12至18日假紅館舉行《阿SAM & 阿TAM HAPPY TOGETHER 演唱會 LIVE IN CONCERT》，昨日兩人以海報造型西裝骨骨出席演唱會記者會，一出場就合唱串燒金曲。台上講到演唱會海報兩人坐在電單車上，阿倫表示Sam是自己偶像：「佢1971年喺大球場有型咁坐開篷跑車出嚟，所以依家我哋就坐開篷電單車。」期間阿倫又乘機向Sam催歌：「上年做佢演唱會嘉賓，我打蛇隨棍上叫佢作曲畀我，但依家都未有。」Sam即說：「作緊。」

唔使Keep Fit自動瘦

阿倫亦謂Sam的《鐵塔凌雲》展開了廣東歌潮流，希望演唱會帶給大家集體回憶。講到兩人有很多金曲，阿倫謂好恨唱Sam的很多歌，Sam即謂兩人可以交換歌唱，每場都唱不同歌，今次兩人會邀不同樂隊的樂手一齊玩，如蓮花樂隊、花花公子、溫拿等，之後贊助商輪流向他們送上紀念品。受訪時問到他們可是場場不同歌？阿倫說：「一定有機會，特別係ending有唔同band。」講到歌衫，Sam謂服裝同事已在泰國找了布料，問到時可會穿豹紋衫？他謂會穿一、兩套，阿倫即笑說：「佢着豹紋我着老虎，到時『虎豹別墅』咁出場，因為『溫拿五虎』吖嘛！」Sam亦謂今次不用Keep Fit，因每場自動瘦3磅。

許冠傑邊彈邊唱，又提議唱Rock版粵曲，並叫阿倫做花旦。

許冠傑與阿倫一出場大唱串燒金曲，令全場High爆。

Rock版粵曲阿倫做花旦

講到兩人今次首次合作開騷，問到會有甚麼特別之處？Sam謂考慮有環節會唱Rock版粵曲，可能唱《帝女花》加《禪院鐘聲》，問到誰做花旦？他即指住阿倫：「佢做花旦，假音好得。」阿倫即笑言之前已曾在慈善節目扮過花旦。講到Sam次次開騷都會錫歌迷，阿倫即笑言今次要幫對方分擔：「男o既佢錫，女o既粗重嘢留番畀我。」Sam即說：「冇所謂，最緊要好玩。」問到可會加場？阿倫笑言現時仍未開賣，但知道外面已開始炒飛：「驚Fans畀人呃，所以唔鼓吹。」

文：音樂組

攝：司徒國榮