Faye Tsui轉型blogger拒呃like
互聯網令世界掀翻天覆地的改變，貢獻之一是多了一種職業叫blogger，崔乘飛（Faye Tsui）正是其中一人，她是本地著名fashion blogger。要如何釐定fashion blogger是否「著名」有人只看點擊率，但Faye絕非沽名釣譽，她的前身是星級形象指導，曾入讀著名時裝學府Central Saint Martins，是真材實料的科班出身，而非呃like的吹水之輩。
對於讀設計而不做設計師？Faye笑謂可能與性格有關：「一件作品由設計開始到完成，需要好長時間，而且牽涉到好多人，我係好性急嘅人，但做形象指導只需要好短嘅時間就可以見到個效果。」
不愛嘩眾取寵
Faye曾經為歌手薛凱琪（Fiona）、許志安、台灣型男王陽明等擔任形象指導。為一個藝人設計形象，她認為最重要是配合對方性格、身形及風格，切忌盲目跟隨潮流，她盛讚Fiona可塑性高：「佢本身好勇於嘗試，着衫好好睇，可塑性好高，算係好百變。」至於王陽明更是Faye喜愛的男藝人之一：「佢本身係模特兒身形，畀乜嘢衫佢着都好好睇。」
Faye坦言不喜歡太浮誇及標奇立異的形象，正因如此，她近年已甚少為藝人作形象指導，她解釋：「因為呢個年代嘅人會想有啲嘩眾取寵嘅元素，呢點我都好明白，我唔係做唔到，但呢個唔係我專長，我寧願同品牌合作，做得好開心。」
每行良莠不齊
而自五年前起，Faye開始轉型，由廣告延伸到無遠弗屆的網絡上，不過當時她只是抱着玩票性質：「有個網站叫我寫網誌，對我嚟講好新鮮，咁我咪試吓囉，將自己鍾意嘅品牌或者配襯心得寫出嚟，但慢慢多咗牌子搵我，後來我就開咗個人網誌，咁就成為咗fashion blogger。」對於人人可以是fashion blogger的年代，Faye看得很開：「每行都有良莠不齊呢種情況，我相信讀者會識得分辨。」雖然現時的fashion blogger不少是收品牌錢為對方打廣告，但Faye認為不要太拘泥廣告與否：「可能好多係廣告成分，但如果我鍾意嗰個fashion blogger，我係睇佢點樣去配襯，睇佢嘅個人風格，收錢都可以襯得好靚。」
Profile
崔乘飛（Faye Tsui）曾於倫敦Central Saint Martins修讀Fashion Design and Styling，畢業後返港為藝人包括關心妍、薛凱琪、許志安等擔任形象指導，以及廣告styling工作，近幾年成為人氣時裝博客。
採訪：陳嘉敏
攝影：劉智源
服裝：Harvey Nichols