祖兒靠煇哥開飯
容祖兒在顧嘉煇榮休演唱會上封煇哥做米「飯」班主，更率領全場萬人「開飯」，原來童年時祖兒每聽起煇哥的電視劇主題曲，便知道是全家的開餐時間。祖兒表示雖未有退休念頭，但為免「脹」化成走樣天后，決意Keep到80歲！
樂壇天后容祖兒前晚為第六場的「顧嘉煇榮休盛典演唱會」擔任嘉賓，穿紅色貼身裙的她獻唱《明日天涯》及《畫出彩虹》，並表示煇哥的金曲令她憶起不少童年回憶：「好記得細個食飯時間大概七點半到八點左右，嗰時啱啱好電視劇主題曲響起，就知要埋位啦！所以我每一次聽到煇哥寫嘅主曲題，就心諗『正！有飯開！』不如唔好講咁多，我哋開飯啦！」其後，祖兒走到煇哥面前，握手答謝這位一代樂壇教父。
大呻揀錯歌
祖兒受訪時表示今次表演的兩首金曲，都是親自揀選，又大呻忘了選唱對師父羅文相當有紀念性的《奮鬥》：「當年老師帶我上台做表演嘉賓，叫我唱《問誰領風騷》同《奮鬥》，記得我學咗成個月，咁難得機會，其實應該唱《奮鬥》，大會叫我揀，一時醒唔起呢個意義。」
怕變大肥婆
問到可有想過效法煇哥做到80多歲才退休？祖兒笑言會時刻保持最佳狀態：「太遠嘅事，歌手生涯唔似作曲生涯可以去到咁遠。（要結婚生仔？）係囉，我會Keep住最好狀態，如果變大肥婆咁上台唱歌，都冇人想睇啦，最緊要唔好『鬆』！」
有指好姊妹鍾欣潼（阿嬌）與男設計師撻着，祖兒說：「冇聽過，阿嬌對感情事低調，呢方面遲啲有機會坐埋一齊會講。」至於另一好姊妹蔡卓妍（阿Sa）盛傳與男友陳偉霆情變分手？祖兒表示：「冇聽過，我覺得唔係。（佢哋少見面？）大家都睇到，所以要更努力維持，佢哋仲好Sweet，因為我好八，偷睇過佢哋微信。」
文：音樂組