李月恃章子怡上位

近年Mandy成為新聞人物，連帶其模特兒公司生意拍擋李月（BoBo）亦頻頻上報。擁有一頭長髮披肩、白皙皮膚、外貌娟好的李月，外表星味十足，有點章子怡和韓星全智賢的混合體，8年前由大陸來港做模特兒時，還是藉藉無名，因被看中拍一個澳門酒店的廣告而成為熱話，該廣告面試了數百位不同國籍的模特兒，最後揀中她，原因是該廣告的大老闆覺得她似章子怡。在港做了幾年模特兒，後來認識了現任夫婿並結婚生子，淡出模界一段日子的她，兩年前「復出」，並夥拍Mandy Lieu開模特兒公司。

望好姊妹幸福

她說：「Mandy做嘢好認真，係一個好自信嘅女仔，大家負責唔同工作，我係model出身，我會企喺model立場着想，唔會當佢哋係賺錢工具。」對於Mandy的感情生活近日成為頭條新聞，李月站在好姊妹立場力撐Mandy：「佢自己選擇咗，一定係好鍾意，值得付出先去做，希望佢快樂幸福，一定撐佢。」更代Mandy澄清錢來自何方：「有人話公司唔係佢投資，話係有人幫，呢間公司冇投資幾千萬，只係少少嘅錢，佢自己都有能力，我係戥佢唔值，好似一下子被埋沒咗。我哋每個人投資6位數，佢入行咁多年，賺到，同任何人冇關係，完全冇關係。」

章子怡	李月夥Mandy Lieu開設模特兒公司。

難忘被踩灑淚

她們的模特兒公司近年旗下的日模清穗久美子和韓模金愛妍成功彈出，掀起過一陣日韓風潮，現正主力發掘內地模特兒，每月定期到大陸各地挑選有潛質的模特兒。李月表示自己亦曾經歷做新人，有苦自己知，記得初來香港時，經友人介紹給一個攝影師拍攝comp card，她說：「嗰日我第一次影相，好新，基本嘢都唔識，嗰位攝影師每影一個鏡頭就話：『點解大陸女仔個個都係咁擺甫士？』『點解大陸女仔啲腳都係咁擺？』，嗰日影咗幾個鐘，影完搭車走時，啲眼淚忍唔住不停流，啲相後尾都冇要到。」後來，她與該攝影師重遇，對方知道她開模特兒公司，還主動跟她打個關照。

她以過來人奉勸準備來港發展的內地模特兒：「有啲女仔畀人踩，搞到冇晒自信就走，如果當日我選擇離開返大陸，就唔會有今日。」她表示希望在大陸開設模特兒公司、及舉辦模特兒大賽。

Profile

李月從內地來港做模特兒，隨後結婚嫁人，2013年夥混血女模Mandy Lieu一同開模特兒公司，現時是星潮娛樂文化有限公司總監。BoBo曾為澳門新濠天地酒店、哈爾濱啤酒、博士倫、西門子和黑人牙膏等拍廣告。

採訪：Tracy Leung

攝影：秦健輝

場地：32公館