斷趾雨僑接job 着涼鞋篤拐杖
「斷趾」雨僑昨日復工，穿上華麗婚紗示範化妝，右腳卻着住涼鞋紮上繃帶，全程篤住拐杖靠工作人員攙扶而行，相當狼狽。對於她主演的《喜愛夜蒲3》是非不絕，導演炮轟曾善美冒認主角登台，雨僑直指客戶貪平，大口氣話：「我係佢嘅四倍價錢！」
日前在家中無故跌斷腳趾骨的雨僑，昨日穿上涼鞋「跛住」出席婚紗展，腳傷後復工的她身穿一件度身訂造的婚紗谷胸現身，為大會做模特兒示範新娘妝，於會場內雨僑要撐住拐杖之餘，還有數名工作人員傍住，忍痛出騷的她表示：「嗰日喺屋企赤腳行平路，突然間『Kick』一『Kick』就整到，我都冇踢到任何嘢。」她又驚爆懷疑戲中的角色被下詛咒：「好似《夜蒲3》個角色受到詛咒咁，一係就抑鬱症，一係就跌斷腳，好多新聞。」
羅力威拒送外賣
見雨僑腳傷頗為嚴重，問到她緋聞男友羅力威可有問候？她表示：「各有各忙，好多朋友都有問候我。」而羅力威昨日出席活動時則表示祝她早日康復，被問到會否幫雨僑買外賣時，他說：「我哋除咗工作之外都要休息，我又唔係醫生，（你係佢嘅靈丹妙藥？）醫生有藥畀佢o架啦，藥到病除。」
雨僑主演的《夜蒲3》負面新聞多多，近日再有曾善美（Mei Mei）被指冒充戲中女角深圳登台，遭導演錢國偉於網上狂插，「正牌」女主角雨僑直言：「會唔會係間酒吧想吸多啲客呀？（覺得慘？）係呀，真係搵食艱難呀陰功，我嘅價錢係佢哋嘅四倍，所以有啲客戶都會因為咁而卻步，諗諗吓都係要搵番AD2。」問到雨僑可感不甘？她說：「我覺得好搞笑囉，咁易呃到人o架咩？」
夏尉喻否認灑淚
此外，o靚模夏尉喻昨日出席護膚品活動，對於Mei Mei被指充主角接騷一事，夏尉喻表示不認識當事人，故不懂評論。談到早前被踢爆新歡是溝女王而淚灑活動，她坦言一直沒有男友，更謂：「蘭桂坊嗰次只係因為條路斜，人哋伸出友誼之手啫！」文：音樂組