官恩娜怒斥撞牛者變態

官恩娜(Ella)昨日一身運動Look,出席在海港城舉行的「F&H BY FANCL舞出.健康 - adidas Dance舞蹈學堂」活動,即場與兩名舞蹈老師跳舞,Ella更跳得有板有眼。

家有三隻愛犬的Ella被問到有否留意日前八隻流浪牛被撞死?Ella直指事件好可怕及心噏:「好殘忍,如果係蓄意殺死牛,心理係咪有啲問題?牛都有性o架。」繼前日徐子珊表示為此而戒食牛肉,Ella亦決定不再吃牛,她說:「令我唔想食牛肉,睇到隻牛喺度喊嘅相,已經冇晒食欲。撞到任何嘢都停車報警,不顧而去太不負責任,好難撞死八隻牛,件事唔簡單,希望快啲水落石出,我怒斥虐畜嘅人,好變態。」

一心不能二用

另外,Ella透露為免被傳媒拍得披頭散髮,故只會在家中跑跑步機做運動。而其外籍醫生男友身材較肥,問到會否約對方一齊跑步?她說:「做運動好個人,同埋我唔可以同人傾偈。」記者笑她與男友多數做「夜間運動」?Ella尷尬說:「我鍾意朝早做運動,鍾意吸收太陽維他命。(早上做運動嘥氣力?)咁出多啲汗、去吓濕同排吓毒,當練氣囉。」

文:音樂組