熊黛林婚姻大事等公告
莫文蔚早前在頒獎禮中宣布與初戀男友結婚，成為全城熱話，不少明星藝人都喜歡挑選特別場合公開喜訊，場合愈特別，大家的印象就愈深刻。而名模熊黛林則認為結婚咁大件事要由未來老公來發放囍訊。
瑞士天梭表旗艦店開幕
熊黛林：無諗過要自己宣布，我覺得婚姻大事，應該由未來老公宣布，佢鍾意喺邊度宣布就邊度，佢係一家之主，應該尊重佢。
Jessica C.及男友Sergio齊表示：如果要結婚，我哋唔介意畀所有人知，仲會選擇喺公開活動上宣布添，最好係珠寶活動上，因為感覺珠寶鑽飾同結婚有關連，話唔定會得到品牌首飾嘅贊助呢﹗
楊洛婷：我經常做公開活動嘅司儀，如果真係要結婚，我會選擇喺活動上公布，喺活動完結前叫大家咪走住，跟住爆肚同大家講我要結婚，應該幾有驚喜。我覺得做珠寶活動時公布就最適合。
全港紙飛機飛行大賽終極展
鄺敏慧：我想刺激同浪漫啲，我會坐住氫氣球升空，向地下派發我要結婚嘅傳單嚟宣布，令所有人都知道我係名花有主，咁就唔會有人再埋我身。
模特兒「翻版陳慧琳」劉莉：會用海陸空三個方式宣布，先將婚訊消息寫喺紙仔上，然後放入好多玻璃樽度，將啲樽放喺大海漂浮。陸上方面就坐巴士巡遊，接住坐直升機拉橫額宣布。
「漂書節」開幕記者會
楊采妮：我真係唔會計劃幾時，我個人好隨性而為，要睇自己當時嘅心情先決定到，總言之自己覺得準備好就會講。
王貽興：我諗我會寫本書去講，由求婚、籌備到結婚，好似真人騷咁，而且出書咁複雜，我估應該無人可以跟到我咁做囉﹗
