陳奕迅搣甩肚腩恨腮骨位重現

身穿一身黑色運動裝束的Eason，昨日以全球代言人身份，現身旺角出席adidas為今屆俄羅斯世界盃舉行的「Create Your Pitch」企劃，場內吸引大批粉絲圍觀，歡呼聲四起。收身成功的Eason心情勁靚，表演花式足球氹粉絲，又指自己由守龍門轉踢前鋒，不過落場踢波都不會出盡力：「都驚拗柴，自己鍾意頂頭槌。」

嫌水腫頸太粗

Eason受訪時，滔滔不絕講到將起行前往俄羅斯睇世界盃，他未去過當地，又未試過現場睇賽事：「最近都係去過黑龍江哈爾濱。」Eason預計主要留守莫斯科，會觀看開幕禮及兩至三場賽事，不過就大呻擔心冇啖好食：「唔知食咩好，中間都會有一日抖，點都會做吓遊客去觀光，參觀紅場。」

講到身形變弗，Eason沾沾自喜表示主要靠減少進食兼做Gym，還搞笑自稱惰性嚴重：「做咗（Gym）一個月，一星期做一至兩次，每次個半鐘，成40幾年都冇做過（Gym）﹗今年開始覺得啲肌肉……企喺度睇演唱會都覺得好『冤』，醫生話啲肌肉唔夠強，就會卸晒啲力落關節位。」Eason又指另一的起心肝Keep弗原因是想腮骨位重現：「條頸太粗，係水腫，好掛住呢個位（腮骨位），係時候要搵番。」問到瘦了幾多磅？他表示沒有留意。

陳奕迅即場表演花式足球。

陳奕迅與眾嘉賓齊齊以運動裝出席活動。

想做手術消眼袋

他指做運動令自己更加精神，更自爆想過做消眼袋微調，令上鏡更精神，不過最後打消念頭：「真係接受唔到唔係發生意外受傷而做手術呢個Concept，自己崇尚自然，同埋都驚有後遺症，萬一失手點呢？」期間又不忘笑說：「可能面部脂肪特別發達，做完（眼袋）生番出嚟就唔抵呀！」