呂慧儀徐淑敏凹凸姊妹情

鬥爆真性情

呂 = 呂慧儀 　徐 = 徐淑敏

呂：我哋都係2006年港姐出身，當年你係超級大熱門，係咪好大壓力？

徐：當時大部分佳麗都唔肯同我傾偈，你出名係social（社交）怪，得你理我呢個孤獨精。但相信唔關大熱事，可能因為自己選美前冇乜工作經驗，唔識同人溝通，覺得唔講唔錯，所以冇乜人理我。

呂：你份人一向走自我路線。

徐：係呀，冇變過！我都唔係香港小姐，冇贏過，所以冇框框。過去多次去到臨死邊緣先畀人拉番上嚟，因為每次有負面報道出街，我講出心裏面說話，跟住就會畀人鬧，話我再咁講嘢就會受到懲罰，類似說話啦……所以死過好幾次！

呂：你都係旅遊大使，唔好以為自己唔係港姐。你仲好啦，咁快投入拍攝，簽無綫經理人合約仲快過冠亞季軍。

恨有三甲名銜

徐：攞獎係一項榮譽，有三甲名銜當然會好啲，做梗頸四好慘架！輸咗第二日已經係天同地嘅分別，工作人員態度唔同晒。

呂：唔……你啲答案真係估你唔到。我份人心水好清，睇人眉頭眼額就辨別得出嗰個人係咪講真話，我最欣賞你嘅真性情，為人單純唔造作，完全唔係雜誌寫得咁複雜。

徐：你一直當我係妹妹，直至兩年前突然同我講，你大個咗好多，冇再當我係白癡妹，哈哈。

呂：嘩，你依家係媽咪級，你當我係妹妹仔就真。其實你咁快結婚，失去好多事業發展機會，覺唔覺得好嘥？

徐：我認為自己冇乜talent（天分），所以對娛樂圈唔會特別留戀，反而一直好想結婚生BB，好彩公司十分體諒，畀我選擇多留時間照顧家庭。

點揀好老公？

呂：你老公黃浩咁錫你，有次佢同傳媒發生衝突，我諗你都好冧。

徐：哈，佢借啲意啫。我第一次同佢去飲嘢，佢已經差啲同人打交，因為個外國人大致話：「中國人食屎啦！」老公問完佢：「講咩呀？」就撲過去想郁手打佢。我坐喺度諗點解會咁呢？當時身邊有個朋友問使唔使過去幫手，我話：「唔好理佢啦，坐喺度睇得嘞。」從此之後，我知道唔可以亂咁刺激佢，但我相信每個人都有優點同缺點，可能我份人包容度高啦。

呂：你怕唔怕畀人話你貪黃浩啲錢？

徐：唔驚，乜都畀人講過，邊理得咁多。好多人話選美可以識到有錢人，但我覺得做邊行都可以識到老闆，但都要睇你條命，識得多都要人哋肯騷你先得o架。我好需要人錫，如果話我貪，不如話我貪愛啦。

留港開店免婚變

呂：聽講你老公打本畀你開美容店，幾時正式做老闆娘？

徐：依家十畫得一撇，我原本想返大陸開醫學美容店，但老公話明如果我畀人影到同其他男人一齊，即使冇嘢佢都會好小氣，一定搞到婚變，既然係咁就留係香港搞啦。

呂：你現在愛情同金錢都OK，但我唔奢望追求完美男人，揀男友唔需要有錢、高大、靚仔。錢，我可以自己賺，自己唔係冇能力，唔好叫我養埋佢就得。反而我最需要一個懂得遷就同關心我嘅男人，可能放工後好攰，返到屋企只想『攤』喺度，連電話都唔想講、乜都唔想做，對方識得體諒已經好足夠，專一同對我屋企人好重要啲。

徐：你就係一個事業型女性，其實你有咁多有錢人追……

呂：哎吔，太過分嘞，玩爆料，我死咗！

大談湊女經

呂：不如我哋講契女Vianna啦，佢好搞笑，係我今年唯一一個有封利是畀佢嘅人。

徐：囡囡有兩個契媽，一個你，另一個Jess（沈卓盈），多啲人錫就最好。不過老公份人比較揀擇，佢話佢班男性朋友全部係Bad Guy，唔適合做契爺，而老公自己都有個契女，但我唔覺得佢有盡責任囉，哈哈。

呂：我都要學定點做人媽咪，有乜心得可以分享？

徐：你搵錯人嘞，我唔係一個好高分嘅媽咪，仍在學習階段。幫囡囡換片、餵奶都識，但從未試過幫個女沖涼，只係睇過，因為奶奶唔放心，有次佢出街，我話幫手沖涼，佢都話唔使等佢返嚟先沖。加上我唔係一個非常有愛心嘅媽咪，玩一陣、抱一陣就覺得好攰，會同阿女講：「你自己玩啦！」我只能夠每日同佢好開心玩一個鐘，其他時間就交畀嫲嫲湊，大家都開心。

無婆媳糾紛

呂：同老人家一齊住有冇唔方便嘅地方呢？

徐：老人家七點幾就食晚飯，初時有啲唔習慣，但依家當減肥，因為我平時三、四點先瞓，可以做到臨瞓前八小時唔食嘢，大收減肥效果。而上晝十點幾起身抱個女落樓下畀奶奶湊，同屋企人住就有呢個好處，完全無婆媳問題。

呂：你諗住生幾多個？我份人比較傳統，最好生一仔一女。

徐：依家又有咗囡囡，但應承咗老公同老爺會追個仔，我有叫大女每晚都錫啖妹妹。但暫時唔會諗人工受孕，可以自然咪自然囉，唔得先畀錢。

後記：第二個至八會?

女人通常鍾意講扮靚，不過呂慧儀和徐淑敏最啱Key的，反而是八卦周邊的人和事，直腸直肚的Suki衝口而出說：「我哋唔講扮靚，行埋就會同佢八是非，因為我好耐都唔返一次TVB，可惜我八嘅嘢仲多過佢，因為老公識好多娛樂圈嘅人，佢講我就偷聽，我要掉轉八番畀Konnie知。」相對仍是TVB小花的Konnie說話較謹慎：「我會選擇性失聰，有啲嘢唔能夠講、唔能夠聽。」認真乖巧！

採訪：林海

攝影：黃叔榮

服裝：BOSS ORANGE（呂慧儀）

場地：H one@ifc