陳貝兒被狂迷恐嚇插眼放炸彈

bma副總裁陳貝兒（Janis）近日慘遭瘋狂男粉絲網上騷擾，該男子甚至不斷致電bma要求與她傾偈及會面，更大講粗口恐嚇接線生，揚言不答應他的要求將插爆Janis隻眼及向bma放炸彈，Janis有感受威脅報警求助，兼請保鏢保護。

主播出身、後擔任bma Marketing & Advertising Ltd.副總裁的陳貝兒（Janis），一直獲不少粉絲留言支持。據知，Janis在有線做主播時已獲一名癡心男粉絲傾慕，不時在Janis的個人網誌、Facebook及微博上載個人照片，直至近日，男粉絲的留言愈來愈激，甚至上載一張與半裸女子的合照，Janis迫不得已即時將相片刪走及封鎖他，男粉絲見狀即轉以「奪命追魂Call」打去bma，其中一次成功接通與Janis對話，不停向Janis示愛，嚇得她急急掛線。

怕嚇親父母

當以為事件告一段落之際，不料該粉絲變本加厲，前日致電bma要求與Janis直接對話及會面，接線生拒絕後，他即發難爆粗恐嚇說：「如果唔係會插爆佢隻眼同放炸彈去公司。」公司有感Janis人身安全受威脅，決定報警。昨日神色凝重的Janis在經理人陪同下到灣仔警署報案，逗留近一小時。

Janis昨在電話中承認事件，她說：「自己都嚇親，所以唔敢同父母講。（認識男粉絲？）冇見過，有留意佢嘅留言同相片，不過佢近日嘅留言有少少過咗位同人身攻擊。」Janis坦言男粉絲近日的行為非常瘋狂，問到會否請保鏢？Janis說：「老闆（羅傑承）會請，我覺得有咁嘅需要，依家出入唔會一個人，夜晚返屋企唔會再出街。（有冇性騷擾？）冇，只係人身安全受威脅。」