Anita開騷李蕙敏幫拖變開拖
早前在YouTube憑惡搞謝安琪《囍帖街》而人氣急升的幕後人曾淑貞（Anita），終夢想成真，將於月底舉行迷你音樂會，日前拍攝宣傳海報，好友李蕙敏（Amanda）二話不說自薦任形象指導，期間她們為擺甫士鬧意見，氣氛一度尷尬。事後Amanda說：「Anita以前係我助手兼經理人，相識十幾年亦曾同居，我哋感情深厚，平時嘅溝通方式的確充滿火藥味。依家佢終於夢想成真，我比佢更開心和緊張。」
Anita承認不習慣被Amanda指揮，她笑說：「以前由我安排Amanda工作，依家掉轉頭由佢督促我，真係唔習慣。」她感激這次開騷得到很多圈中人支持，說：「雖然喺呢行撈咗十幾年，但幕前只屬新人，幾乎所有我湊過嘅歌手明星都話要用唔同嘅方法支持我，令我好感動。」除了得到圈中舊人支持，Anita不忘支持新人，安排樂壇新組合Lander上台表演。
