贊助商通融 大帝留騎士機會高
「大帝」勒邦占士究竟何去何從，似乎已有答案！一直被指能夠左右占士意向嘅贊助商Nike，其總裁丹遜日前表示，唔會干涉占士嘅選擇，只要佢覺得邊隊能夠奪冠，占士就會同嗰隊簽約。少咗贊助商嘅阻力，不少專家估計占士會同騎士再續一紙三年合約。
一直盛傳勒邦占士贊助商Nike向「大帝」施壓，希望呢位天之驕子能夠喺今夏離開克里夫蘭，改投大城市球會紐約人，進一步加強佢嘅人氣，成為另一個活士。但紐約人班底並唔雄厚，就算有勒邦占士加盟，實力亦難與湖人或魔術等強隊相提並論，難得騎士近兩年都成為常規賽冠軍，要占士倒退加盟紐約人，的確講唔通。
湖人今晨鬥塞軍或缺拜林
總決賽方面，雖然塞爾特人現時僅落後1比2，表面上仍大有機會從後趕上，但從數據來講，塞軍已幾乎奪標無望！因為自NBA總決賽於85年改為2-3-2賽制後，比分若打成1比1，只要贏得第三回合嘅球隊，就一定奪得總冠軍。
不過，湖人都唔係無隱憂嘅，中鋒拜林在第三戰受傷，今早第四回合隨時無法上陣，若然拜林缺陣，加素一個未必頂得住塞軍幾位內線巨頭。
■本報綜合報道