脫星Stormy Daniels單性醜聞，纏繞到今日都仲未講完，作為女方當然唔會放過任何抽水機會啦！但靠把口講賺極有個譜，將口水變成香水賣遍全球，流「香」百世，先係明智之舉呀！Stormy姐嘅香水，你今日買咗未？呢支名叫「Truth by Stormy Daniels」香水固之然係抽水之作，但撇開背景唔講，呢支亦係Stormy姐第一支處女香水，好值得祝賀。講番支香水，據Stormy Daniels親口表示推出香水嘅目的，係因為佢作為一個誠實嘅人，會選擇擁抱真相，誠實面對自己，以增強信心及改善生活上種種不足，以達致時刻檢討及做出榜樣，藉此影響我們周圍嘅人。如果你對號入座，的確係句句都有骨，相反純粹當係脫星推出個人品牌香水，就會覺得唔止係真相，仲好有真理添！而真相係不論男女老幼都可以使用呢支香水，事關Stormy姐形容香水味道絕對中性，兼且香氣持久，而呢種香氣除咗係個人象徵，亦會提醒你時刻掌管自己生命。係咪咁厲害？真係要試過至知喇！