如果每個人所做嘅決定都係有動機嘅話，對於南韓嘅模特兒嚟講，佢哋入行嘅動機又係乜嘢呢？相信當中大部分唔係為錢就係為咗名氣，但係宋珠兒就唔同，佢坦言係為咗追求刺激感同挑戰自我。
要挑戰自我同追求刺激感嘅方法有好多，有人會選擇玩極限運動，亦有人去學唔同嘅嘢，對於宋珠兒嚟講，佢就選擇咗一行自己從未諗過會做嘅工作，就係投身模特兒界。宋珠兒自細嘅夢想係成為一位賽車手，正當佢不斷向呢個夢想邁進嘅時候，有晚佢同一班朋友睇模特兒大賽，當時佢笑稱做模特兒工作好簡單，只需要擺吓甫士就得。點知呢番言論一出，立即引嚟朋友反駁，話想食呢行飯唔係咁易，事關競爭相當激烈，同埋有好多要求，原來呢位朋友嘅家姐正係從事模特兒工作，所以非常了解。
為咗驗證朋友所言，喺對方搭路之下，2014年宋珠兒開始做攝影模特兒，唔做猶自可，一做先至知道以前嘅佢係幾咁無知，佢發現模特兒工作並非表面睇咁簡單，唔單止要留意演出技巧，仲涉及各種社交技巧同埋攝影知識。雖然對於佢嚟講有相當難度，但係性格剛強嘅佢唔會咁容易放棄，更認為呢次係挑戰自我嘅好機會，於是佢不斷努力，好快就掌握到箇中技巧，而憑住出眾嘅外形，人氣漸漸提升。及後，模特兒事務所安排宋珠兒以車模身份喺賽車展覽登場，首次喺大型活動演出，心情當然非常緊張，但憑住堅定嘅意志，最後能夠成功演出，令事務所對佢更有信心。
翌年宋珠兒獲得賽車女郎嘅工作機會，首次喺賽場上登場，透過呢次大型賽事，佢嘅性感形象備受注目，尤其係激凸嘅雙峰，更係令人有驚艷嘅感覺。演出經驗愈嚟愈多，同時人氣亦愈嚟愈高，宋珠兒嘅工作範圍唔再局限喺車模及賽車女郎，同時以攝影模特兒身份為多本潮流及時裝雜誌拍攝寫真，又擔任商品模特兒。作為一位入行唔夠兩年嘅模特兒嚟講，如此成績相當卓越，但係事務所認為未夠，因此推薦宋珠兒參加「第4屆韓國賽車模特兒大賽」，憑住高企嘅人氣及艷麗嘅外形，最終奪得最佳新人獎。
獲獎之後，工作量激增，不過宋珠兒似乎覺得仍未夠忙，仲參加電競比賽，原來佢好鍾意打機，而且仲係高手嚟添！正所謂有機會唔好嘥，大會搵埋佢做客席主持，實行邊做網絡直播邊參賽。呢個做法唔單止令佢嘅知名度大為提升，同時又展現出原來佢做主持相當有潛質。雖然佢最後未能喺電競比賽中獲得名次，但係已經為佢贏得極大嘅宣傳效果。不過凡事有利亦有弊，由於工作實在忙到爆，為免壓力過大，最終佢放棄電競及主持工作，專心從事模特兒事業，希望能夠再闖高峰。
簡介：宋珠兒嘅樣貌同身材都相當誘人，唔單止五官分明，一副魔鬼身材更係睇到人流晒口水，尤其係一對激凸雙峰，更係令人留下深刻印象。問佢最滿意自己身體邊個部位，佢就覺得臀部最性感，唔知大家同唔同意呢？如果想了解宋珠兒多啲，就要Click入呢個網站喇！
網址：http://cafe.daum.net/SongJA
出生地：慶尚南道昌原市
身 高：168cm
三 圍：34-25-36
撰文：魂