兼顧亞冠聯賽更生猛朱Sir為傑志驕傲
今季於港超提早奪冠的傑志，距離實現今季聯賽不敗偉業，只剩下煞科戰主場對陽光元朗一關。「藍鳥」今季以初哥身份出戰亞冠，由最初面對大敗，到取得歷史性首勝，為球迷帶來美好回憶，主帥朱志光則認為，球隊能夠在應付亞冠的同時，聯賽競爭力有增無減，才是最大的驚喜！
下半季開始要兼顧亞冠賽事的傑志，今季聯賽未嘗一敗之餘，亦有望成為本土「三冠王」，主教練朱志光坦言一切得來不易︰「正所謂『創業易，但守業難』，我哋作為聯賽冠軍，要蟬聯就要有好嘅心態。球隊係有穩定性進步，我哋聯賽至今入咗六十幾球波同失咗十零球波，係一個好好嘅數據。今季其中一個驚喜，就係保持到一定嘅平均入球數字，證明我哋攻擊力好夠，加入咗盧卡斯，再配合辛祖同艾力士等人，佢哋嘅入球數字都好平均。」
科蘭加盟令球隊豐收
對於烏拉圭球星科蘭的加盟，並協助傑志出戰亞冠賽事，令球隊知名度及球員經驗等方面都有豐富收穫，「朱Sir」亦指帶來了正面的衝擊︰「科蘭帶咗一啲好正確嘅比賽閱讀同態度畀球員，踢亞冠嘅一段短短時間就幫到我哋作出改善。雖然開頭唔係踢得咁好，始終要挑戰亞冠水平嘅賽事，但傑志每場波都有進步，而我哋亦用行動去證明，加上分組賽尾段一對中堅都受傷，喺人腳調動上都要稱讚球員嘅心態準備得好好。」
寄語「泡泡龍」勿輕言滿足
自從鄭展龍在對柏雷素爾一仗射入絕殺波後，「泡泡龍」便成為一眾球迷及傳媒的新寵兒，多年來一直栽培他的「朱Sir」則對「泡泡龍」今季「大爆發」不感意外，更勉勵他要繼續努力向上︰「大家都讚『龍仔』有幾好，正因為佢係『龍仔』，外界同球迷都太錫佢，但佢仲未達到我心目中最高嘅水平，『龍仔』擁有成功嘅條件，不過仲要靠佢自己努力、心態同性格。佢份人太隨和，要做個一線球員唔可以凡事都太隨便，要有對自己更苛刻嘅心態。當然佢為香港足球創造歷史，亦攞到入球獎項，呢啲絕對係鼓勵嚟，我都戥佢高興，但對年輕球員嚟講，獎項係冇意思，嚟緊仲要攞好多錦標先得，我寄語『龍仔』唔好以為攞咗呢啲獎項就夠，如果輕易滿足就會好危險。」
文：何彥霆