唔怕口術「九狗久」葉鴻輝減壓靠晒百厭狗

「我唔係英雄!」無論不厭其煩回帶多少次,「英雄輝」的名字,已與葉鴻輝畫上等號,但原來在隊友玩笑間,這位港足大門守護神,還有另一別號:「精神輝」。如同「黐線」的認真態度,由初入球壇僅得5000元月薪,到如今成為最高薪華將之一,都從未變改。只是橡筋拉得太緊也會拉斷,長期認真的阿輝全靠「百厭狗」Geoffery鍛煉EQ,哪怕對手使出「九狗久」口術,繼續冷靜接招!

「英雄輝呢個名,我唔鍾意咗好幾年,我只係做番自己責任,足球要靠全隊努力,洗衫執波都有付出……」由9月「中港大戰」紅爆全城以來,葉鴻輝將以上對話重複又重複,就連傳媒訪問也推卻不少,不欲將光芒獨攬。「英雄」光環背後,阿輝笑言只是平凡宅男,懶得出街,獨愛煲劇,這一年生活變熱鬧,全因多了牠相伴──活潑調皮的積羅素犬Geoffery!

積羅素犬調皮考耐性

「收養牠前特別上網蒐集資料,雖然好多人也說積羅素犬好百厭,但我就是喜歡挑戰高難度。」球場上屢救險球,偏偏教導小狗卻考起阿輝,家中護脛、波砵,不時變了Geoffery口中玩具。「教狗好像教細路,不可與牠們角力,適當時候就要鬧,真的要好有耐性,一定不可以躁。」看着Geoffery搖頭擺尾撒嬌,威風八面的「英雄輝」也難得柔情。

一個「狗」字,令阿輝成為新聞人物,他卻無悔敢言作風:「我既然寫得上facebook,就要承擔後果。不過相比以前,依家處事已冇咁衝動。」自上季在東方戴上隊長臂章,阿輝收斂燥火,自我要求卻依舊一絲不苟,即使港隊首席門神位置穩如泰山,也從不敢Hea:「運動員對自己冇要求就好快玩完!球圈不少例子引以為鑑,年輕球員容易被吹捧幾句便放鬆心態。或者是好勝性格驅動我要好好保住位置,別人也會進步,更加不可偷懶。」心態決定命運,回想17歲初登港甲僅得月薪5000元,到今日薪酬十幾級跳,源於刻苦堅持:「嗰時食個下午茶唔使20蚊,5000蚊絕對夠用。當時我定下目標,20歲踢球會正選,23歲為港隊把關,想不到Timeline全部早了好幾年。」

望港足球迷捧埋球會

港足早年在廣州亞運、亞洲盃外圍賽虎頭蛇尾,聽得最多的是「請給港足時間」。近期港足氣勢如虹,該是收成的時候?阿輝認為最大進步是心態:「Kim Sir(金判坤)在這3年來,要求我們每場比賽首要零失球,我們不自覺也被洗腦,就算贏不到也要追和,不再輸少當贏。」

心態改變,就連外界尊重亦是前所未見。「以前個個話踢波冇前途,依家出街會有fans鼓勵,坐滿西環街頭睇波,點會諗得到?」無奈聯賽入座率未見大幅提升,阿輝慨嘆:「不少球會努力經營,像東方每場比賽都花盡心思宣傳。希望大家支持港足的同時,球會賽事亦多多捧場。」

圖/文:KaKa