冇男人唔想成為溝女王，只係要成為溝女專家本身已經好難，仲要成為當中嘅王者更係難上加難。有人唔認同呢種講法，覺得有錢又有外形，呢個世界就冇溝唔到嘅女。不過美國溝女王尼爾‧史特勞斯（Neil Strauss）卻表示溝女唔使講呢啲，只需要識得當中嘅技巧就得。憑住佢超過10年嘅溝女經驗，先後推出《把妹達人》同《把妹達人2：遊戲規則》嘅溝女手用，而嚟到佢「把妹達人」最終章《把妹達人完結篇：搞定人生下半場》（The Truth: An Uncomfortable Book about Relationships）時，卻一反之前傳授溝女心得嘅宗旨，反而同大家講述溝女人生背後不為人知嘅點滴。
現居於洛杉磯嘅Neil，喺書中講述作為一位溝女王，究竟佢最後嘅結果係點？係咪溝咗個心儀囡囡後結咗婚，從此過住幸福快樂嘅生活呢？佢話畀大家知，風光過後不為人知嘅真相，剖白喺2015年告別溝女界後，當中所經歷過嘅一切，例如喺溝女嘅過程中，點樣破壞咗人哋嘅感情同婚姻生活，事後又點帶住罪咎感回顧呢啲事情等。另外，佢自爆婚後雖然立心同太太走過人生下半程，卻仍然忍唔住偷食，危害婚姻關係，因此聽從朋友建議去性愛成癮診所接受治療，從中經歷一段關於愛情、性、關係同自我嘅探索之旅，並且以「很不幸，我不是這個故事中的英雄，我是個壞蛋。」作為溝女王人生嘅總結。
書名：《把妹達人完結篇：搞定人生下半場》(The Truth: An Uncomfortable Book about Relationships）
售價：約HK$125
撰文：魂