時空回溯改命運

近年唔少電視劇同電影都玩時空穿越嘅橋段，就連日本成人遊戲亦唔例外，講到鹽花場面同劇情兼備嘅作品，就要數到由遊戲商Lass最新推出嘅《Liber_7 為你等待億萬年》。遊戲中嘅男主角石動直斗擁有「讀取同改寫人與物記憶」嘅異能，只係佢一直以嚟都刻意唔使用，以免引起不必要嘅麻煩。居住於小城市綾女之丘嘅佢，本嚟每日同青梅竹馬天塚未來同楠瀨沙綾過住平淡安穩嘅生活，不過喺某年嘅七夕前夕，頻頻發生各種慘案同恐襲事件，正當佢意識到自己處於危險漩渦當中時，面前出現同樣擁有異能嘅美少女殺手，經過一番戰鬥後，佢發現城市已變成異能者嘅戰場。突然眼前一道強烈閃光，佢就暈倒，當佢醒來後發現自己竟然返回3日之前嘅朝早！呢個時候佢收到一個短訊，內容指異能者中有人係「7人的反叛者」成員，如果唔想城市3日後遭到毀滅，就要舉行「神人密議」讓新嘅神人誕生，城市便能得救。至於神人嘅產生，就要通過異能者之間嘅戰鬥，剩低最後嘅一個便會成為城市嘅拯救者。