提到「晶女郎」，近年大家較為熟悉嘅有孟瑤、童菲及田蕾等，個個都獨當一面，潛質優厚，但原來仲有一個漏網之魚，佢就係嚟自河北嘅靚女鄭亦桐。
今年29歲嘅鄭亦桐，自幼就喜歡表現自己，所以唱歌跳舞樣樣皆精，及後佢考入藝術學院嘅表演系接受學院式培訓，可謂紅褲子出身。畢業後亦桐就投身影視界，出道以來拍咗數十套影視作品，但就與王導演最投緣，自2009年參與《大內密探零零狗》開始，跟着《未來警察》、《財神客棧》、《大上海》等，亦桐也有份參與演出，雖然只係二線角色，但每次都帶畀觀眾不一樣嘅驚喜，而且深得王導演嘅喜愛，仲話有戲開一定預埋佢，可見桐妹嘅地位絕不遜於其他「晶女郎」。而喺電視圈，亦桐已經係一線女演員，擔正做女一號嘅作品更多到數唔晒。
至於鄭亦桐最令人深刻印象嘅，就係佢上年參加《舞林大會》比賽，由於亦桐自小練舞，舞藝精湛，所以被喻為比賽嘅頂頭大熱之一，可惜因表現過於自信，反被評判狠批，第一回合就被淘汰出局，阿妹喺後台雨帶梨花地接受訪問時，深深打動咗觀眾，讓佢於決賽日再獲邀上台獻技，成為當日嘅亮點之一。之後就被近年轉做幕後製作人嘅葉璇睇中，搵埋佢同林峯合演《紫釵奇緣》，劇中亦桐飾演京城三大舞姬之一，所以世事往往就係咁，塞翁失馬焉知非福，喺舞台上失意嘅亦桐，喺事業上就闖出高峰，而阿妹除咗演技好之外，身材亦斤量十足，35C級亦係幫助佢成功上位嘅原因。
簡介：鄭亦桐係專業演員，所以性感寫真唔算太多，但佢喺微博內就收藏咗好多自拍靚相，當中不乏展露既深且長嘅事業線，粉絲們一定唔可以錯過呀！
網址：http://weibo.com/u/1501877483
出生地：河北邯鄲
三圍：35-24-35
身高：166cm
撰文：龍四海