夏志明︰我要拍港產片！
「做人如果冇夢想，同條鹹魚有咩分別？」冠忠南區前鋒夏志明（James）雖已圓職業足球夢，但「子彈」從來沒有放棄過成為一個偉大電影家的理想。由小時候用相機「玩玩吓」，到有機會向荷里活級猛人攞料，現時更與女友自資成立製作公司，James希望守護屬於本港的電影文化，亦期待其作品可呈現在大銀幕上。各位球迷，夏志明版的《讓子彈飛》，即將上映！
足球場上夏志明為冠忠南區於前線衝鋒陷陣，但他場外卻轉戰幕後，在與女友Alison成立的Scene 852製作公司中擔任監製，原來James自少已培養出對攝影的興趣：「細個第一段剪嘅片就係喺維園踢波，擺個相機喺地下錄自己玩花式，再加插歌曲，剪完片後覺得好型，達到目標嘅成功感非比尋常。」
成為職業足球員後，James曾將電影夢「擺埋一邊」，不過他從來沒有放棄過成為一個偉大電影家的理想，約3年前的一次受傷，反令電影夢再現曙光：「我係個好熱血嘅人，一諗到就即刻做，一做就會咬實唔放，受傷嗰陣我個人坐唔定，咁啱有美國電影公司到香港拍攝《人造天劫》，結果我做咗導演Dean Devlin嘅助手，佢啟發同灌輸咗我好多攝影知識。」這位曾擔任《天煞——地球反擊戰》的監製與編劇之後更邀請兩人到美國近距離觀摩，難忘的經驗令James決心在港建立自己的電影文化，加上有電影系畢業的女友作支援，終於攜手成立製作公司。
成立公司拍廣告吸取經驗
一塊白板，加上5個人及幾部電腦，公司的無數構思就在約100呎的工廈房間內誕生，曾為Sónar音樂及藝術節、斯巴達障礙賽等多個大型活動及國際品牌製作廣告，James的目標亦只有一個：「終極目標當然係拍電影！香港冇咩拍得上外國劇情嘅戲，好似《無間道》咁成功嘅戲愈嚟愈少見。其實香港人好有創意，外國嘅故事內容未必叻你好多，但點樣去表達就做得好好，所以依家就算係拍廣告，我哋都會用番電影拍攝方式，保留故事性。希望作品保留到香港特色之餘，亦加入外國拍攝元素，終有一日會呈現在電影銀幕上！」
James亦期望自己的作品可以如他最喜歡的電影《勇者無敵》般，讓觀眾得到啟發：「戲中主角雖然係個好好打嘅MMA選手，但佢都好謙虛冇睇低人，呢種態度係我最鐘意，好想拜佢為師！呢種戲對我影響最深刻，令我行出戲院同現實脫節好耐，不斷思考同反省，係一套好成功嘅戲。」
學習態度要保持「年輕」
要足球與電影事業兩者兼顧，James坦言忙個不停，每日都要操練一至兩課，惟有早點起床、遲點睡覺，他指兩者都缺一不可：「做每一個製作，我都探索到好多唔同嘅人和事，就好似踢港超咁，每一場變化都好大，都學到好多嘢。無論踢幾多年，就算身體無咁弗，好似謝德謙同沈國輝咁，學習態度依然好年輕，每一個球員好學心都非常強，呢個就係冠忠南區最大優勢。」「做人如果冇夢想，同條鹹魚有咩分別呀？」難怪最後James表示即使自己「窮到燶」，都會繼續追逐電影夢。
．本周賽程．
11月9日（四）
國際友誼賽
香港 Vs 巴林
旺角大球場 晚上8時
$150、$40（特惠票）
圖／文：袁志浩
（部分相片由受訪者提供）