賜B變爸B重拾新生

「賜Ｂ」由昔日大細路變為顧家好男人，全賴妻子Marble及兒子景恒。

「BB剛出世時係咁喊，初初覺得好得意，但好快就要諗點樣養大佢。」抱着出生僅兩周的兒子景桓，已成「爸B」的楊賜麟手勢純熟，絲毫不像平時嘻皮笑臉的「賜B」。「佢對小動物同小朋友好有愛心，每日練完波返嚟都幫手湊B，換片餵奶難佢唔倒！」看着妻子Marble投以讚賞目光，「賜B」感恩良緣天注定。「有時真係整定，識咗老婆2、3個月，佢就提我要儲錢為將來打算。」闖蕩球圈8載，出道初年的「賜B」備受看好，這些年載浮載沉，全因一個「Hea」字浪費光陰。「細個覺得大把時間，飲飽食醉掛住玩，飲到第2日冇精神練波，諗番都覺辛苦。特別係加盟黃大仙頭半季遇上感情問題，踢落去又唔起勁，起身已經練完波，唔止身邊人對我半放棄，我都差唔多放棄咗自己。」

多謝招Sir尹東憲鞭策

對的時間遇見對的人，谷底之中未被遺棄，除命中注定的她出手牽引，還幸良師益友從旁點醒。去季初因球會財政問題被減薪至6,000元，久遺的鬥志竟被燃起。「招Sir（標準灝天教練招重文）半鬧半氹引導我，加上黑仔（王景華）及聲仔（傅樹聲）等黃大仙升班功臣，本身可以做番自己工作收入穩定，為咗夢想依然笑住捱落去，當堂覺得好慚愧。」「賜B」兼職教波幫補家計，季中回復「正常」薪金水平，咬緊牙關轉個彎，前路風光更明媚。「韓援尹東憲同我講Kim Sir（港隊教練金判坤）有留意我，初初都係聽下算，點知Kim Sir季前曾喺熱身賽後同我握手，叫我改善紀律同態度，仲話會考慮畀我試下。依家只要練波有少少唔集中，尹東憲都會用廣東話激勵我，畀佢同招Sir日哦夜哦，完全醒晒。」

楊賜麟	身為標準灝天隊長的楊賜麟（左）走出迷霧，決心為球隊打拚。	足球路上多得「招Sir」（右）扶持。

昔日奧運隊隊友有的提早離場，有的投身大球會，曾經迷途的「賜B」終學會珍惜當下，縱然無緣下月港澳埠際賽名單，上輪聯賽為標準灝天射入靚波，足已證明隊長臂章的價值。「我就快27歲，喺華將中差唔多已係年紀最大，要學識照顧人，唔再好似以前要畀人照顧。做咗爸爸更加要有責任感，畀囝囝學埋我啲衰嘢點算?」笑聲依舊，卻多了一份男人的承擔。

圖／文: 徐嘉嘉