小牛再被刺傷 止唔到血
【本報綜合報道】小牛懷念魯域斯基！季初表現神勇嘅小牛，自從「牛魔王」魯域斯基因傷缺陣後，已經淪為其他球隊嘅點心，近期頹勢持續，昨日德州打吡戰作客馬刺亦未能止血，而且全場捱打，打完第3節已經敗局難挽，令成個第4節變成垃圾時間，最終小牛以89比101不敵對手，將魯域斯基缺陣期間嘅劣績改寫為2勝7負。
小牛季初喺魯域斯基壓陣期間，取得24勝5負佳績，但自從呢位德國籍主力去年12月受傷後，總共缺席咗9場比賽，小牛冇咗佢成績一落千丈，其他隊友根本分擔唔到佢嘅得分重任，控衞傑特頻頻靠自己搵食，無奈手風又唔順，令小牛陷入低潮。
「牛魔王」急於復出
輸畀馬刺後，魯域斯基話好心急復出：「見到球隊係咁輸波，感覺唔好受，其實我嘅傷勢已好轉，但跳起時仲有啲痛，希望可以盡快復出。」