今日糜博：經驗少魅力增

好多男人都成日吹噓、誇耀自己閱女無數，等自己可以喺男士圈子中威一威，而喺女性圈子又可以建立自己嘅情聖形象，博下班女仔會唔會因為明星效應而向自己投懷送抱。不過，如果閣下有呢鋪癮，切記要戒呀！因為性經驗愈少，魅力就愈大，唔係我吹水呀，係一位日本大學教授講㗎。早前，日本濱松大學嘅教授若尾良德，就一個人散發嘅魅力進行研究，發現性經驗愈少嘅人，身邊嘅朋友對佢嘅信賴程度會增加，異性想同佢拍拖，甚至發生一夜情嘅意欲亦更高，至於箇中原因，教授就冇解釋，但係小弟就認為一個性經驗少嘅人予人正經感覺，梗係信得過啦，而且異性亦會覺得佢唔濫交，同佢上床惹到病嘅機會自然低好多啦。