早一陣子，阿裕同唔少球迷一樣，都深感熱火今季雷聲大、雨點小，坐擁「三巨頭」竟然打唔出水準，成績令人失望。不過，籃球唔係單打獨鬥嘅遊戲，熱火季初新埋班磨合不足，教練史普斯達又未搵到運用「三巨頭」嘅最佳方法，加上外界對三巨頭寄望太大，更添三位球星壓力，失準難免。
幸好，上月初主場不敵塞爾特人，令熱火上了寶貴一課，熱火「三巨頭」領略綠軍「三巨頭」嘅勝利方程式，保殊效法加納特專注防守，進攻盡量交畀兩位拍檔；勒邦占士就代入皮雅斯做策劃，至於韋迪就同雷阿倫一樣，專心為球隊搶分，故現時熱火「三巨頭」已經搵到自己定位，唔會好似季初犯下重疊大忌。因此球隊亦愈戰愈勇，寫下十連勝。雖然今日對手紐約人近況同樣不俗，但實力同熱火有距離，故阿裕認為熱火贏七、八分冇問題。
永倫及前香港隊中鋒 蔡芳裕