麥基迪任噓唔嬲
麥基迪自上季與火箭分手加盟活塞後，尋日首度回歸休斯敦豐田中心比賽，雖然前隊友姚明及希斯賽前呼籲球迷唔好噓佢，但火箭迷始終難掩心中怒火，每逢「T-Mac」攞波都噓聲如雷，結果作客嘅活塞亦備受影響，最終以八十三比九十七不敵火箭，「T-Mac」賽後話已習慣被噓。
効力火箭長達六季嘅麥基迪，上年遭教練阿杜文投閒置散，最終被交易至紐約人，輾轉間今季改投活塞。「T-Mac」上次在豐田中心打波，已經要追溯到上年十二月，事隔三百五十日重返舊東家比賽，賽前獲不少前隊友歡迎，其中姚明更與麥基迪擁抱擊掌。
姚明幫口都冇用
不過主場球迷就冇咁大量，從麥基迪首節替補入場起，每逢佢一掂波，球迷就報以噓聲，搞到佢大為冇癮。「T-Mac」今場合共上陣廿三分鐘攻入十一分，另搶得三個籃板及貢獻三次助攻。其實火箭迷之所以咁憎麥基迪，多少因為佢効力火箭後期態度散漫，「T-Mac」當時年薪高達二千萬美元，屬頂薪球星，但表現甚至不及一些僅領最低薪酬嘅球員，加上「T-Mac」傷患頻頻，近年坐多過打，令火箭迷對佢完全死心。
火箭今場續缺姚明，但史高拉打出今季代表作，起手廿五次十六中，全場轟入卅五分及搶得十二個籃板，協助火箭由頭帶到尾贏九十七比八十三，贏出近四戰第三場比賽。
焦點人物麥基迪賽後表示，由於佢已經唔係第一次嘗到舊東家噓聲滋味，所以已經習慣，仲話母會速龍嘅球迷噓聲仲勁過火箭添！至於姚明則認為麥基迪冇功都有勞，球迷唔應該噓佢咁話。
本報綜合報道