亞運男子足球十六強，中國隊迎戰宿敵南韓，國足無論大小國腳，多年來遇上南韓，都冇啖好食，一直被嘲患有「恐韓症」，更何況中國隊今屆表現乏善可陳，上仗分組賽若非踢多三人，最終能否出線，實屬疑問，今次面對勁旅南韓，睇怕幾難再有運行。（有線61台周一晚7時直播）
中國隊今屆嘅表現可以用羞家來形容，首仗吞日本三蛋，已令廣大同胞大失所望，跟住對吉爾吉斯，有八十分鐘處於落後，直至最後五分鐘，才驚險反勝二比一，上仗雖然大勝馬來西亞三比○，但唔好忘記當時踢多對手三人，贏波都唔值得驕傲。
國足今次整體表現，可謂攻不銳、守不穩，特別係進攻冇板斧。內地傳媒指領隊孫衞靠人脈上位，教波料子有限，佢上仗賽後更話，人多打人少反而唔知點應付，更令人質疑其領軍能力。加上佢今次係臨危受命接手球隊，明顯仍未建立出一套有效戰術。
至於南韓雖然首場輸畀北韓，但之後兩仗分別大勝約旦四比○，以及贏巴勒斯坦三比○，表現出「太極虎」頑強風格。事實上，南韓今屆爭金意欲極強，派出強陣參賽，有八名大國腳，包括効力法甲摩納哥嘅前鋒朴主永，佢喺上仗對巴勒斯坦，射入一球，中國隊淨係要對付朴主永，已經非常頭痛。
感情上當然希望中國隊可以贏波打入八強，但奈何實力及狀態，始終同南韓有一段距離，希望國足可以盡力踢出水準，即使贏唔到波，亦要贏得尊嚴。