○八年先成軍嘅雷霆，參戰第二個球季已打出身價，常規賽取得六成勝率，以西岸第八名身份殺入季後賽，隨着「得分王」杜蘭特嘅演出愈來愈成熟，雷霆今季被各界看好，莊家更封佢哋為西岸次熱，僅次於上屆總冠軍湖人，都咪話唔巴閉！
雷霆最大本錢就係青春，如日方中嘅杜蘭特只係二十二歲，呢位上季得分王，平均每場得分喺三十分以上，最難得係三分、籃板同助攻樣樣掂。佢喺今個夏天嘅世錦賽，盡顯巨星風範助美國奪魁，奪得MVP可謂實至名歸。當地有傳媒認為，佢奪得常規賽MVP的機會猶在勒邦占士同高比拜仁之上。
其他主力好似「0號」控衞韋斯布克及大前鋒謝夫格連，都係冒起得甚快嘅新人，兩人同樣係二十二歲，年輕有活力之餘，仲有好大進步空間，佢哋對勝利都充滿飢渴感，今季嘅雷霆大有雷霆萬鈞之勢！