小巨人領軍教聾殘學生打波

「小巨人」姚明一向鍾意做善事，嚟到廣州亦把握時間出席社區活動。佢尋日喺廣州體育學院籃球館，指導一班小朋友打籃球，除姚明外，表情生鬼嘅火箭球星柏堤亞亦相當受小朋友歡迎。

奇雲馬田亦玩得好開心，同小朋友打籃球之餘，仲攞咗部私伙錄影機周圍拍攝。火箭多名隊員都認為，今次ＮＢＡ關懷行動相當有意義，而班同學仔亦認為能夠同咁多球星一齊打波，係非常難得嘅機會。