姚明最強對手係邊個？火箭今晚喺廣州同籃網打表演賽，吸引超過一千名球迷及過百名記者追訪。姚明心情似乎不錯，同記者有講有笑，當傳媒問佢最強對手係咪魔術中鋒杜域侯活時，姚明竟然講笑話，佢一生最大敵人係記者！
（無綫明珠台、now 635、廣東體育及中央5台周六晚7時30分直播）
籃網前晚喺北京啟程往廣州前，特別抽空參觀萬里長城，而火箭就去咗五棵松籃球館操練。兩隊昨日凌晨二時抵達廣州酒店，由於姚明係上海人，當地酒店特別炮製咗上海小籠包招呼佢。
火箭昨日安排下午12時30分到廣州體育學院進行訓練，但早上11時，已有超過一千名球迷喺場外等候。當火箭抵達場館時，球迷爭相追逐大巴，希望吸引姚明注視。火箭嘅公開訓練亦吸引超過一百名記者採訪。有記者追問姚明杜域侯活係咪佢一生最難纏嘅對手，點知姚明話最難應付嘅係記者，逗得在場記者捧腹大笑。
值得一提，北京站因傷缺陣嘅火箭兩屆明星賽球員畢米拿已正式復操，預計今晚將擔任姚明嘅替補，或會同姚明合演雙塔陣式。火箭有兩大球星壓陣，到時肯定將場上氣氛推至頂點！