【本報綜合報道】格蘭希爾要拍片參加電影節！這位卅七歲的ＮＢＡ太陽老將原來唔止打波勁，拍電影都好「耍家」，早前佢為母校一位前教練製作一套體育紀錄片，嚟緊仲會參加埋電影節，不過佢強調籃球始終喺佢心目中第一位，講到退休問題更完全未諗過。
唔講唔知，原來格蘭希爾喺大學時代已經係藝術發燒友，曾經籌劃過二十世紀非洲美洲藝術展覽會，去年佢仲學埋隊友拿殊做埋執行製作人，幫母校公爵大學前教練畢舒拿拍咗一套紀錄片，名為《Starting at the Finish Line：The Coach Buehler Story》，上周末仲搞咗個私人放映會添！