WC極罕球衣貼身SHOW

撞口撞面成街隊友

每屆世盃期間，走在鬧市街頭，都會發現香港市民着住波衫「上街」嘅比例直線上升，突然間球衣亦成為一股Fashion潮；然而根據經驗，由於決賽周隊數得卅二隊，而受歡迎強隊更不離十隊八隊，故「撞衫」指數極高，通街都係「情侶裝」或「兄弟裝」，感覺都幾冇癮！故今日我哋就搜羅咗一批極冷門國家隊球衣，做到人冇我有！

「Roller天使」蔡穎怡每逢世盃都會選購冷門球衣，一臉豐富經驗樣子的她分享了自己研究所得：「西班牙、葡萄牙、英格蘭等強隊便不用多說，出街撞口撞面都係『隊友』；甚至連科特迪瓦、加納、尼日利亞等非洲隊嘅都通街有得賣。

「因此今屆我就選購了智利、洪都拉斯這兩件球衣，生產商BROOKS與JOMA在港極為冷門，故我要到外國拍賣網落Bid或到樓上球衣專門店要求代訂才能買到心頭好。」

兩大名牌滄海遺珠

別以為冷門牌子球衣難找，兩大品牌NIKE及adidas亦有部分國家隊因本港代理商沒有入貨而成為稀有品種。本身為NIKE贊助運動員的三項鐵人許煒森就表示：「雖然新西蘭及斯洛文尼亞有好大機會於分組賽出局，但自己為免在世盃期間與路人『撞衫』，就託朋友幫我訂了這兩件『水貨』球衣。其實新西蘭款式也不錯，全黑設計很型亦罕有，這是我的至愛！」另三屆奧運游泳代表蔡曉慧，則對adidas出品斯洛伐克隊球衣情有獨鍾。

斯洛伐克啱學生哥多啲

設計同其他adidas世盃波衫大異其趣，少咗好多Detail位，但卻好有Old School Feel，似乎似校隊波衫多過國家隊波衫。

冷凍指數：★★★★★

智利這品牌太罕有

老實講呢件衫嘅設計真係非常簡約，但最重要嘅係Brooks呢個品牌一向做開跑鞋，未聽聞過佢哋有做波衫，貪佢夠罕有咯！

冷凍指數：★★★★★

洪都拉斯設計簡約低調

JOMA唔算罕有，西甲好多球隊都着佢，不過洪都拉斯就真係世盃稀客，講到設計其實相當低調，同洪國嘅弱旅形象襯到絕。

冷凍指數：★★★★★

新西蘭叨欖球隊的光

新西蘭欖球隊嘅全黑戰衣舉世聞名，當然新西蘭嘅足球水準同欖球水準差天共地，但呢款波衫承襲全黑設計，唔打得都睇得！

冷凍指數：★★★★

斯洛文尼亞聖峰掛在心口

遠看就像美國漫畫人物「綠燈俠」，但其實胸口前那條好像恒生指數的折線，是代表該國的聖峰，作客綠色看起來更Sharp醒。

冷凍指數：★★★★

3星Profile

蔡曉慧 Sherry Tsai

示範球衣：斯洛伐克

學校：中大體育運動科學系碩士

項目：游泳

威水史：2000、2004、2008年奧運香港代表

蔡穎怡 Katherine Choi

示範球衣：智利、洪都拉斯

學校：城大應用社會科學系

項目：滾軸溜冰

威水史：2010年廣東省花樣輪滑錦標賽冠軍

許煒森 Vincci Hui

示範球衣：斯洛文尼亞、新西蘭

學校：拔萃女書院（中六）

項目：三項鐵人

威水史：2010年青年奧運香港代表

圖、文：司徒子文