湖人鬥綠軍叫好叫座
NBA經典決賽重現！昨日西岸決賽，湖人作客以111比103擊敗鳳凰城太陽，總比數四比二淘汰對手進身總決賽，將與「綠軍」塞爾特人爭奪總冠軍。兩隊曾於08年總決賽碰頭，當時湖人敗喺塞爾特人手上，今次仇人見面，湖人眾將揚言要報回一箭之仇。
之前兩場主場贏晒嘅鳳凰城太陽，今仗頭三節發揮未如理想，一度被湖人拉開17分差距，太陽教練根特利惟有孤注一擲，換入後備巴布沙、達基斯上陣，反而有更佳表現，不過喺第四節嘅關鍵時刻，湖人始終技勝一籌，最終以8分差距擊敗鳳凰城太陽。
高比75次「30+」超天鈎
今場得分最高係湖人嘅高比拜仁，全場攻入37分，包括喺最後兩分鐘射入9分，成為贏波最大功臣，今場亦係高比仔第75次喺季後賽取得30分以上，喺歷史上超越「天鈎」渣巴排第二，僅次於波神米高佐敦。
高比仔賽後表示：「總決賽對塞爾特人係矚目嘅對決，我哋兩年前輸過畀佢哋，今次係證明我哋已經進步神速嘅好機會。」中鋒加素亦話要報仇雪恨：「我有時都會諗番兩年前嘅決賽，嗰次我哋輸得好唔抵，今次輪到我哋發威喇！」
自騎士出局後，NBA好擔心今年決賽戲碼叫座力不足，幸好依家兩大傳統勁旅湖人同塞爾特人都打入決賽，兩隊係NBA史上奪標次數最多嘅球隊，塞爾特人贏過17次，湖人則奪標15次，今次亦係兩隊史上第12次喺決賽碰頭，夠晒話題性！
總決賽賽程
6月4日9:00am 湖人主場
6月7日8:00am 湖人主場
6月9日9:00am 塞爾特人主場
6月11日9:00am 塞爾特人主場
★6月14日8:00am 塞爾特人主場
★6月16日9:00am 湖人主場
★6月18日9:00am 湖人主場
★如有需要才舉行 （香港時間）
兩軍表現大比併
湖人今季統計
主場成績：42勝7負
作客成績：27勝22負
平均得分：102.3分
平均失分：97.7分
塞爾特人今季統計
主場成績：31勝19負
作客成績：31勝18負
平均得分：98.8分
平均失分：94.8分
本報綜合報道