高比射爆鳳凰城
巔峰高比正式回歸！西岸決賽尋日揭開戰幔，縱然湖人領袖高比拜仁賽前受膝蓋水腫困擾，但似乎無阻其發揮，高比仔全場轟入40分，協助湖人以128比107大勝鳳凰城太陽先拔頭籌。高比仔連續六場攻入30分以上，而今場亦係佢本季季後賽首次「40+」得分，足證最巔峰嘅高比拜仁已經回歸。
「周身傷」嘅高比仔戰罷次圈後，發現右膝出現水腫情況，所以早前讓醫生在右膝抽取大量液體，往後均未有參與球隊操練。不過，高比仔已用行動證明右膝冇大礙，今場開賽後多為球隊組織攻勢，但下半場就挺身而出擔當得分重責。高比仔單係第三節已飆入21分，可謂無人能擋，難怪球迷當時都不斷向場內高呼「MVP、MVP！」湖人最後一節繼續拉開領先優勢，最終以大勝打響頭炮。
帶傷爆籃無人能阻
全場受對手雙人夾擊嘅高比仔依然狂飆40分，而今場亦係其季後賽生涯第11次「40+」，而單節21分亦創下個人季後賽單節新高。呢位戰神賽後表示：「我希望表現得更有侵略性，不斷作出投射、剷籃，然後得分。」而教練積遜則大讚愛將：「高比明顯控制了今場比賽，要知道佢今周飽受膝傷困擾，未有太多操練。」
鳳凰城太陽方面，今場有養傷已久嘅羅賓盧比斯復任正選，貢獻14分表現不俗，可惜球隊仍阻唔住弗爆嘅湖人。第二回合將會在明早上演，湖人繼續擁主場之利。 本報綜合報道