眾所周知湖人擁有一條超強內線，中鋒拜林拍上加素組成「雙塔」，還有防守專家阿堤斯在附近，堪稱完美。不過「紫金兵團」仲有一個關鍵人物，就係第六人奧當，呢位大前鋒腳步較拜林靈活，今場被派遣防守對方大將史杜迪米亞，結果大派用場。
今場奧當上陣後即成為湖人奇兵，單係上半場已攻入15分及8個籃板，可謂橫行內線，最終奧當全場貢獻「雙雙」19分及19個籃板，寫下個人季後賽籃板新高。鳳凰城教練根特利賽後亦承認忽略咗奧當：「奧當統治了今場嘅籃板球，佢上場後明顯為湖人帶來一種額外力量。」
湖人今季以高薪4年3300萬美元與奧當續約，唔少人都質疑佢唔值呢個價，始終以後備兵嚟講，薪酬的確過高。不過奧當屢屢在季後賽都能打出驚艷演出，表現甚至比正選嘅阿堤斯及拜林都要出色，證明後備兵都係值得拿貴合約。