東8最後懸念

速龍盡努力紐乾坤

速龍早前喺「尾班車生死戰」中慘負公牛，形勢急轉直下，但幸好球隊尋日作客擊敗活塞，只要聽朝擊敗紐約人，而公牛在餘下兩戰中輸掉其中一場，速龍就可以搶走東岸第八，殺入季後賽。 （周四早上8時開賽）

速龍昨憑巴格蘭尼轟入33分及搶得7個籃板球，領速龍大勝活塞111:97，終止常規賽五連敗頹勢。不過主力雲斯喺最後階段弄傷右足踝，要隊友攙扶下一拐一拐步離場，現時仍未公布傷勢如何，但相信極大機會喺煞科日缺陣。

紐約人無心戀戰

速龍主將艾馬莊遜賽後表示：「我哋現時只能祈求其他對手將公牛擊倒！」不過速龍聽朝對紐約人非勝不可，幸好後者已緣盡季後賽，近期表現有神冇氣，近四場常規賽輸咗三場。再者速龍今季三對紐約人全勝，相信紐約人亦唔會阻人發達，速龍勝算不俗。