金塊爭排名戰意強
今季西岸競爭激烈，預計未到常規賽煞科日，都未知最終排名。截至尋日為止，除湖人一馬當先外，暫列第三嘅小牛與太陽及金塊同得50勝27負，三軍僅次爵士半場勝仗，成績非常接近。其中最肉緊應該會係金塊，因為佢哋同爵士同區，若然未能超越爵士，就會被迫以第四位或更後排名參戰季後賽，屆時首圈將會非常難打。所以論戰意，金塊一定較湖人佳。
此外，湖人近態認真唔掂，近六場常規賽輸咗四場，就連球迷都認為「紫金兵團」態度散漫，早前對馬刺時向球隊柴台。最大問題係高比拜仁近期手感極差，近兩戰合共47次起手僅入13球，命中率連三成都冇，加上拜林受傷未愈，加素往往變得獨力難支，相信今場作客金塊都凶多吉少。