公牛輸Double季後賽抆水
【本報綜合報道】NBA常規賽唔夠三星期就完結，力圖爭入東岸前八嘅公牛尋日遭逢重創，主場出擊竟以74比103不敵熱火，創下今季得分新低。因為熱火正係公牛爭入前八嘅競爭對手之一，所以公牛今場失利可謂「輸Double」！公牛現時落後第八嘅速龍兩場半，搭上尾班車愈來愈「抆水」。
韋迪返芝加哥掌聲多
熱火作客芝加哥，對於「閃電俠」韋迪嚟講當然毫不陌生，因為芝加哥係佢家鄉，所以韋迪甫出場便掌聲雷動，公牛球迷更希望佢下季會選擇以自由身加盟。韋迪大改打法，主力為隊友穿針引線，全場僅起手7次中5球得12分，但就交出10次助攻，佢賽後表示：「我知道對方一定會用兩個球員夾擊我，所以我決定為球隊作串聯，讓更多嘅空位隊友得分，結果戰術奏效。」
熱火有六位球員得分雙位數，其中謝美奧尼爾就攻入最高24分，而熱火亦升上東岸第六位。
公牛輸波後，已落後第八位嘅速龍兩場半，要爭上尾班車愈見渺茫，教練迪尼高賽後一面無奈表示：「球隊今晚未有打出應有鬥志，我已無話可說。」事實上公牛今月表現差強人意，計埋今場大敗在內，近13場常規賽輸11場，若然最終未能打入季後賽，絕對係咎由自取。
