政情：唐唐落敗 大輝思退
往事是否如煙？四年前，被指為唐英年「家臣」嘅林大輝，代表廠商會參選立法會工業界功能組別一擊即中，當時大家都深信佢進入議會，無非為咗扶助唐唐登上特首寶座。不過事與願違，唐唐因為婚外情及大宅僭建醜聞，喺特首選舉中大熱倒灶，連帶本來滿腔熱血嘅大輝亦變得意興闌珊，尋日大輝仲慨嘆，其實自己都唔係好適合從政。莫非佢就咁黯然退出政壇？
赴獅城避特首選舉新聞
特首選舉結束後，唐唐離開香港呢個傷心地，遠赴美國探女，而大輝亦趁住過去幾日清明節假期，去咗新加坡散心，聲言要好好思考一吓自己嘅未來。大輝尋日同傳媒聚會時話，佢去到獅城，除咗可以着短衫短褲，朝朝瞓到十點鐘先至起身外，仲可以遠離所有有關特首選舉嘅新聞，但就自爆期間亦有同唐唐聯絡，但聲稱大家只係傾閒偈，並無商討何去何從喎。
大輝話，實情佢不時都會反思，當然愈接近立法會選舉，反思自然愈多、愈密，反思嘅結果係，佢覺得自己嘅性格唔係好適合從政，又話從政以外仲有好多方法服務社會喎。咁大輝仲會唔會參選立法會呢？佢無一口拒絕。即使大輝肯選，早就有風聲話廠商會嫌佢嘅「家臣」味道太濃，所以挺梁嘅前立法會廠商會代表呂明華、前會長尹德勝都對大輝嘅議席虎視眈眈。
不過，廠商會終歸係唐唐嘅老巢，所以梁營中人要突圍都唔係咁容易，如果要益自己友，除咗挺唐嘅現任會長施榮懷有可能出選外，莫非真係如傳聞所言，個議席會留番畀唐唐延續餘下嘅政治生涯？
無論如何，尋日大輝言談間確實帶點黯然、落寞，同以前嘅神采飛揚、口若懸河大相逕庭。如果大輝真係黯然退出政壇，佢喺立法會組成嘅「五散人」自然散晒，連帶佢年前聯合一大班區議員組成嘅地區組織「C18」亦會完成歷史任務。
究竟唐營前路何去何從，大輝就話等唐唐本月下旬返港後，可以試吓拉埋唐唐一齊見吓大家喎。