昨晚在北京五棵松體育館上演嘅NBA中國賽，火箭喺「小巨人」姚明帶領下，猶如擁有半個主場之利，結果以九十一比八十一擊敗籃網。姚明昨晚順理成章成為主角，每次接波都獲球迷歡呼，而佢太太葉莉亦有入場，為丈夫打氣。
剛傷愈復出嘅姚明昨晚正選上陣，雖然復出冇耐未在最佳狀態，但喺自己地頭獻技特別落力，火箭教練阿杜文亦識做，畀多啲時間姚明落場，等中國球迷有多啲機會睇到佢嘅演出。
火箭一開賽即控制戰局，一度拉開至十幾分，可惜阿根廷大前鋒史高拉因太太臨盆缺陣，影響內線發揮，打到第三節畀籃網追到僅兩分差距，幸好火箭第四節回勇，成功擊敗對手。
火箭同籃網今日會南下廣州，準備周六嘅中國賽第二戰。