騎士上次在波士頓花園贏波，已要數到○六年二月，此後九次作客波士頓全部輸波，亦代表塞爾特人自組「三巨頭」後，勒邦占士都未曾作客贏過佢哋。不過，「綠衫軍」今場續缺三分王皮雅斯，實力削弱，但較快入局，首節過後已領先十分，「Big Baby」格連戴維斯更於第二節封籃時打傷奧尼爾手部，「巨無霸」亦因傷提早離場，令騎士陷入困境。

大Ｚ重返騎士「輔帝」

然而，「大帝」下半場發威，第四節初段已領軍反超前，及後愈戰愈勇將比數拋開廿分，最終騎士以108比88贏波，四年來首次作客綠軍贏波。「大帝」今場攻入36分之餘，亦交出9次助攻及7個籃板球，表現極佳。

騎士贏波外，另一好消息係早前換到巫師嘅舊將「大Z」伊高斯卡斯，已被球隊買斷合約，成為自由身。據悉「大Z」已返回克利夫蘭屋企，準備日內與騎士簽約，再度「輔帝」。