一眾孭飛巨星高比拜仁、基斯保羅及艾佛遜等缺席明星賽，至於今屆入樽賽亦星光暗淡，最慘係四位參賽者仲要「求求其其」交行貨，其中沙朗布朗喺初賽只係完成反手入樽，以及背籃入樽等「例牌菜」。謝勒華萊士亦用差不多同一招「交貨」，於是眾望所歸以低分被Out。至於尼特羅賓遜同迪羅辛雖然唔見得好突出，不過佢哋至少肯嘗試較高難度動作，迪羅辛一次籃框邊反彈大風車入樽，就成為賽事唯一一次滿分動作。

扮啦啦隊搞氣氛

到了決賽的戰情依然乏味，杜域侯活喺場邊睇到搖晒頭，幸好見慣入樽賽大場面的尼特羅賓遜識得搞氣氛，一次完成入樽後搶走啦啦隊女郎嘅花球跳舞，令幾乎瞓着嘅球迷起哄。最終經過網上投票，尼特羅賓遜以51％得票贏出，他奪獎後感性地表示：「好開心可以再贏冠軍，我想將獎項送給在醫院留醫的媽媽，希望她早日康復。」

至於重頭戲東、西岸明星賽，則於香港時間今晨九時開波，且看由「大帝」勒邦占士領軍的東岸明星隊能否趁高比拜仁受傷而打低西岸明星隊。（無綫明珠台、高清翡翠台及now 670直播）

■本報綜合報道