第五十九屆NBA明星賽周聽日正式展開，打頭陣有二年級生對今季新秀嘅新秀對抗賽。自○三年開始，近七屆新秀對抗賽都由二年級生勝出，贏得最少嗰場都贏6分，實力同爭勝心明顯較高，今年相信可取得八連霸！（廣東體育周六早上10時直播）
新秀對抗賽○○年開始改由二年級生對新秀，過去十屆戰績一面倒，二年級生贏咗八次，最近更連贏七屆錦標。事實上二年級生累積經驗肯定較一眾青葱新秀成熟，加上二年級生話晒都係「學長」，若然輸畀新秀肯定肉酸，鬥心亦較強，成為壟斷主因。
雖然上季最佳新秀戴歷羅斯已退隊，但其實新秀隊一樣有格芬因傷缺陣，兩軍均會缺少「狀元爺」。今屆二年級生嘅身高佔盡優勢，擁有兩員七呎以上嘅中鋒布克盧比斯及馬克加素，內線明顯佔優。基於新秀隊今年未有選中鋒入伍，最高只係六呎十吋嘅活塞新人謝拉寶高，輸高度都輸死，二年級生應可延續八連霸。